[i]مساء الخير \صباح الخير
اللي هو الموهيييييييييييييم
انا جديدة بينكم
ليه هالنظرة مومصدقين والله جديدة
وانا مارة بمنتداكم عجبني وطق بمزاجي اصير بهالقسم واصلا المنتدى كله دخل براسي
الله يبارك لكم بي ومبارك عليكم انا
وحبيت اول قصيدي يكون عن اغلى شخص بالدنيا كلها
تستاهل الغالية تستاهل
بلاهذرة زايدة وهذي القصيدة وابي الردود
يووووه سندرتو راسي :&&!:
يا بحور الشعر كوني بالعدد كثر الثواني
من زمن حوّاء إلين آخر رحم ينجب جنينه
بي سفينة من مشاعر ما تكفّيها مواني
والشعر عشرة بحورٍ ما توفّي هالسفينة
الشعر في شكله واحد من زمانه الأولاني
له طواريقٍ قديمة يتّبعها ناظمينه
واللي يشعر يحتطب لكن بواديه المعاني
والحطب هو سر حرفه والشعر شعلة حنينه
الحطب فيه الغضا بالنار الأول ما له ثاني
وفيه عرفج في ثواني تشعله ويطفى بحينه
والسمر له ريح طيّب باشتعالاته تباني
والتتن لا خير في ناره ولا خير ابدخينه
والأصيل ابن القبايل لا لفاله الضيف عاني
أشعل العود الأصيل وطيّب الضيف ابيمينه
هذا كلّه من خشب له جذر متشتت يعاني
يرضع نهود الترايب لجل من ياطا جبينه
بس مو كل زين زين وما هو كل زينٍ يزاني
وبالمزاين اتزاين كل زين وكل زينة
والمباني ما اتشابه وان دعيناها مباني
والمداين تختلف وان كان مفرده مدينة
ياشعر علمني وشلون اصبح أسطورة زماني
وكيف اخلي كل طفلٍ يبتدي ابحرفي رطينه
وكيف أعدّي هالسّما من دون ما أبرح مكاني
وكيف ازلزل كل صدرٍ واحبس انفاسه رهينة
وكيف أخلي الشمس تشرق كلّ ما ينطق لساني
ولما اسكت تعتذرلي في خشوع وفي سكينة
ولا تدري لا تحاول توصف احساسٍ غزاني
والله انّي ما أبرضى لو تواصيفك رصينة
كيف أوفّي حقّ شخصٍ من شرايينه غذاني
لين طالت قامتي من بعد نطفة مستهينه
كيف أوفّي حقّ مخلوق ابْحشا متنه كساني
تسعة شهورٍ حملني ما اشتكى ضعفٍ وهينه
كيف أوفّي حقّ أمّي يا كبر ذنبه بياني
كيف أوفّي قلعةٍ في مصحف الباري حصينه
كيف أوفي قمةٍ هي أعلى من شوفي وعياني
كيف أوفّي نسمةٍ أحيا بها بس ما تبينه
كيف أوفّي شمعةٍ ماعت جوانبها عشاني
دمعها زادٍ لها و"الأف" تطفيها غبينه
هي بشر في أرضنا بس طينها من كون ثاني
والله اعلم هي ملاكٍ بسّ ماخذ شكل طينه
كل ما شلت القلم عقلي توسل بي ورجاني
وش بينفعك القلم والفكر عاجز لا يعينه
يكفي انّك أسمك امّي هذا يشعرني ابهواني
والأسد مهما تعالى كان شبلٍ في عرينه
أمي ...
يا أجمل لحن أعزفهُ على أوتار عودي
يا إشراقة شمس في الليل والنهار
يا أجمل نبض يطرقه القلب
يا شجرة حنان مابين الاشجار
أمي
أنتي مو بس تاج راسي أنتي أسباب الجناني
وأنتي روحي وأنتي عمري وأنتي أحضاني الأمينة
لا ضحكتي ما أصدق أن بالدنيا أناني
ولا ابتسمتي ما أصدق يبقى في العالم ضغينة
ولا بكيتي كنَّ همَّ الكون كلّه بالمحاني
ولا عصاك ابيوم دمعك تصبح افراحه سجينه
أسألك باللي من السبع انزل السبع المثاني
لا حزنتي لا تجيني ودمع عينك تذرفينه
والله أني ما أبعرف أحضنك ولا أعاني
ولا أشكي ولا أبكي ولا أسمع ما تبينه
صدقيني ما أبالغ لا حزنتي بس ثواني
ودي أبذل كلِّ مالي بسّ ما شوفك حزينه
فدوةٍ لك كلَّ ما لي مو عطيّة بس عشاني
ما أبي أخسر حياتي ابْسيف دمعٍ تشهرينة
ولو بيديني أشتري عنك الحزن تالي الزماني
كان من دمّي شريته لا نفذ ما بالخزينه
أنتي دمي وآنا دمك كيف انا بانسى مكاني
يوم كان اسمي جنينٍ يغتذيبك واتحمينه
وان عطيتك ما عطيتك ما أظن أقدر أداني
نص حقك ولا ربعه ولا أدنى ما ترينه
يكفي انّي أنسى نفسي لاذكرتك في كياني
وانسى اسمي وانسى لوني وانسى كل العالمينه
يا بعد أنتي يا بعد كل من دعاني
يا بعد هالعالم انتي والسماوات المتينه
البدر باسمك تسمّى يا عصب عظم المحاني
والشفق لجلك تحنّى لا وقفتي اتطالعينه
الله اللي بك حباني وأشهد أن الله كفاني
واشهد أنه ما ظلمني وما ظلم حدٍ بدينه
أسألك بالله يا أمي، بربٍ بك حباني
بالعزيز اللي دفنلك جنّته تحتك رهينه
تغفريلي كل غلطة وكل زلة من لساني
وكل حرف وكل فعل وكل ما يخفى ويبينه
خايفٍ ربي وخايف دعوتن تنطر دفاني
دعوتن تنصرك منّي وان بكى قلبك دفينه
دعوةٍ تحرم ظنينك لا غدت كل الأماني[i][i]
جنةٍ يلقاك فيها قبل قصره وحور عينه
أوعدك مادمت حي اني أغطيك ابحناني
واوعديني تذكريني لا وقف قلبي رنينه
لجلك استنزف خفوقي كل لحظة وكل آني
وان قضى نزفه خفوقي اجرح اجروحي واعينه
لجلك أبنيلك قصيدة مالها في الكون ثاني
يا أهم انسان عندي بين كل العالمينه[/i]
وفالنهاية والختام
استودكم الله الى اللقاء [/i]